Skúlasøgan

Sum alla aðrastaðni í landinum blivu børnini lærd at arbeiða og lesa heima. Í fólkateljingini í 1801 stendur um Sunnevu Olesdatter, at "hun underviser ungdommen." Sunneva hevur helst búð í Tøvuni. Í kommunulógini frá 1872 stendur, at skúlaskipanin skal setast á stovn, og sama ár kom fastur lærari til bygdina, Hans David Hansen. Hann hevði skúla úti í Beiti við Garð - fyrst við trimum næmingum - til 1882, tá flutti hann í tann nýggja skúlan á Bugnum, sum hevði skúlastovu í sunnara enda og læraraíbúð í heimara enda.

Ein lærari (Karl Kristiansen) bleiv settur afturat í 1910, og tá bleiv skúli eisini hildin í Høgnahúsum til 1936. Tá ið tann triði lærarin (Eliesar Reynberg) varð settur í 1923, bleiv læraraíbúðin á Bugnum gjørd til skúlastovu.

Í 1936 varð skúli bygdur á Skarðsáryggi, og í 1966 varð hann vaksin við skúlastovum, serhølum, fimleikarhøll og svimjihøll. Í 1958 varð preliminerskúli settur á stovn, og hann var skipaður til realskúla í 1964. Síðsta realpróvtøkan var í 1981. Síðani 1972 hevur fullfíggjað framhaldsdeild verið í Fuglafjarðar skúla við 8., 9. og 10. flokkum, har næmingar úr Gøtu og Leirvík eisini ganga.

Fyrstu 60 árini vóru hesir lærarar í skúlanum í Fuglafirði.

Lærari í Fuglafirði 1872-1898 Hans David Hansen (1843-1898). Føddur í Kollafirði, tók læraraprógv í 1872 Hann var lærari í Leirvík, Fuglafirði og á Hellunum.
Lærari í Fuglafirði 1897-1900 Súsanna Katrina av Skarði (1876-1978). Fødd í Tórshavn, tók læraraprógv í 1896. Hon var lærarinna í Leirvík, Fuglafirði og á Hellunum.
Lærari í Fuglafirði 1899-1910 Kristianna Johannesen (1875-1922). Fødd í Lamba, tók læraraprógv í 1899. Hon var lærarinna í Leirvík, Fuglafirði og á Hellunum.
Lærari í Fuglafirði 1906 Jens Martin Mohr (1886-1918). Føddu á Sandi, tók læraraprógv í 1905 á Jelling Seminarium
Lærari í Fuglafirði 1910-1950 Karl Kristiansen (1885-1973). Føddur í Fuglafirði, tók læraraaprógv í 1908. Hann var lærari í Fuglafirði og á Hellunum.
Lærari í Fuglafirði 1917-1918 Magnine Debes (1896-1983). Fødd í Kollafirði, tók læraraprógv í 1917. Hon var lærari í Fuglafirði og á Hellunum
Lærari í Fuglafirði 1918-1923 Anna Elisabeth Olsen (1898-1967) Føddí Klaksvík, tók læraraprógv í 1917. Hon var lærari í Fuglafirði og á Hellunum
Lærari í Fuglafirði 1923-1963 Eliesar Reynberg (1896-1981). Føddur í Funningi, tók læraraprógv í, tók læraraprógv í 1917
Lærari í Fuglafirði 1926-1944 Súsanna Laksá (1905-1987). Fødd í Haldórsvík, tók læraraprógv í 1926 Hon var lærarinna í Fuglafirði og á Hellunum.

Frá 1872 til 1910 røkti lærarin skúlarnar í Leirvík, Fuglafirði og á Hellunum.

Til 1965 hevði lærari í Fuglafirði hálva tíð á Hellunum. Tá fóru næmingarnir á Hellunum at ganga í skúla í Oyndarfirði.